​《流行经典50年》完满落幕！马德钟竟然係首次上台献唱？接棒嘅新版《劲歌金曲

《流行经典50年》完满落幕！马德钟竟然係首次上台献唱？接棒嘅新版《劲歌金曲》亦正式开始录影！

上次可乐君就同大家讲过，

播足4年嘅王牌节目

《流行经典50年》即将停播。

当时都有唔少朋友话

佢越做越闷，

嘉宾又重复...

话咁快，

节目嘅last一集

就喺上星期日播出啦！

话晒係最后一集，

节目组都想搞得好好睇睇，

所以就call齐历任嘅主持回归：

汤宝如、陈敏之、胡枫、胡诺言

全部都翻晒嚟！

每位主持都带咗自己嘅

艺人朋友到场，

虽然职业歌手就唔多，

不过胜在人多，

睇落都几大阵仗噶！

作为第一代嘅主持，

汤宝如后期倒戈去咗隔离台

嘅《Chill Club》,

好难得见到佢翻大台。

今次佢就联同好姐妹

王馨平一齐合唱

《飞出恋爱街》

而好搭档曹永廉都唔输蚀，

今次一次过搵嚟三位老友：

黄智贤、唐文龙、敖嘉年。

佢哋做戏大家就睇得多啦，

唱歌真係少有，

都不过不失啦！

嗱，一讲到星梦，

相信大家一定会谂到星梦娱乐，

而星梦最先签落嘅歌手入面，

就有《星梦传奇》出身嘅郑俊弘。

今次郑俊弘就叫咗6位当年

有份参加《星梦传奇》嘅artist上嚟，

包括王君馨、杨思琦、李璧琦、

郑世豪、叶暐、周子扬。

估唔到时隔8年，

星梦同学会仲可以一call即到，

呢份革命友情认真唔话得！

要讲当晚点燃全场气氛嘅

一定要数《降魔的》姐妹花

谭嘉仪同刘佩玥啦！

第一次喺《50年》唱歌嘅阿moon，

今次竟然拣咗sammi

嘅《信者得爱》，

唱成点都係其次，

斋睇佢嘅长腿look就够晒煞食！

啱修读完营养学嘅欧倩怡，

前排就宣布复出，

今次单拖喺《50年》献唱，

可以话係打响头炮！

歌手出身嘅佢，

唱功认真唔话得！

不过欧倩怡自己就表示，

复出嘅话唔係一定要係娱乐圈，

就算做营养师都OK,

最紧要係畀机会自己搵翻自我价值~

而当晚最有睇头嘅，

就梗係马德钟上台唱歌嗰刻啦！

话说马神好耐之前就

已经想上嚟节目Jam下歌，

但咁啱次次都撞正要开工。

好彩今次终于都成事，

赶得切上尾班车，

视帝做戏就冇得弹噶了，

估唔到佢都唱得两嘴~

原来事前马神喺屋企都

秘密练兵咗好耐，

怪唔知都唱得唔错啦~

唔讲唔知，

原来录影最后一集当日，

亦係家燕姐嘅牛一！

所以当日家燕姐嘅3个

仔女都有到场帮手贺寿，

新官上任嘅志伟

亦有现身帮送花畀寿星！

对于因为志伟嘅改革

而刹停《流行经典50年》，

家燕姐就觉得

知道志伟係有心做翻好综艺科，

让路支持绝对值得！

再加上佢嚟紧亦准备抱孙，

所以唞下都係好事。

而志伟就表示，

年底就会有新节目安排畀家燕姐，

唔知係新版《50年》

定其他综艺呢？

当时真係要拭目以待啦！

喺当晚节目大合唱环节，

大家就拣咗《50年》嘅灵魂人物

黎小田先生嘅作品

《再共舞》。

陪伴大家4年嘅

《流行经典50年》就正式落下帷幕了！

由今个星期开始，

同一时段就正式开播

新版嘅《劲歌金曲》。

同三大唱片破冰之后，

大台嘅劲歌金榜即时焕然一新，

再都唔係星梦剧集歌霸屏。

而最近网上亦都有

第一集《劲歌金曲》嘅嘉宾名单流出，

各大唱片公司都有派歌手出席，

如果属实嘅话，

今次嘅阵容都真係几有睇头啵~

嗱，

新版《劲歌金曲》就要

今个星期日先出街，

不过宣传片就已经有啦，

你哋到时会唔会开机支持啊？

More · 今日娱乐看点

《你好李焕英》票房

贾玲自导自演嘅处女座

《你好，李焕英》

截止今日累计票房超53亿，

领先《神奇女侠》，

而贾玲亦成为全球票房最高女导演！

胡杏儿三胎生仔

今日胡杏儿喺微博宣布，

佢嘅第三胎出世啦！

今次依然係仔仔，

取名Liam李奕宏。

真係恭喜晒！

柯南剧场版内地定档

柯南剧场版

《名侦探柯南：绯色的子弹》

在内地宣布定档4月17日，

又可以喺戏院睇柯南同毛利兰啦！

资料来源：微博、节目截图

互联网综合整理